गजल( नाम जिन्दगीको !)

दुई दिनको रमझम रै'छ, नाम जिन्दगीको !
एकदिन डुब्नै पर्ने रै'छ घाम जिन्दगीको !

कसले चिन्ने, कसले जान्ने, निर्दयी नियति
लेखिएर नि बन्द रै'छ, खाम जिन्दगीको !

मनको बस्ती छोडेर जाने हो भने बजारमा
रक्सीभन्दा सस्तो रै'छ, दाम जिन्दगीको !

जानुछैन केही लिएर संसारबाट, तरपनि
माया मोहमा लामै रै'छ, लाम जिन्दगीको !

नाफा अनि घाटाको हिसाबमा मान्छेहरु
कठै ! नाघेर हिड्ने रै'छ, राम जिन्दगीको 

Ishwor Balami

07.05.2015