एकै पल पनि हजारौँ युग समान हुन्छ मायामा
रिस अनि घृणको लागि सम्पूर्ण जीवन छोटो छ ।
मर्दा केहि लिएर गएका तिनी पनि होइनन्
घरको दलिनमा अझै पनि जसको भोटो छ ।
म मान्दिन तिम्रो ईश्वर, येशु, बुद्ध अनि अल्लाह
मेरो मन मन्दिरमा मानवताको जिउँदो फोटो छ ।
यो संसार तिनको पनि हो सबैको जस्तो
तर तिनी संसारको हैन जसको भाग्य नै खोटो छ ।
ईश्वर बलामी
२३।०९।२०१६
कुनाकाप्चामा बच्चा बच्ची खेल्ने भाँडाकुँडीहरु देखिए
उप्कीएका भित्ताहरु, छेउैमा छरपस्ट मुडामुडीहरु देखिए
कहाँ बिक्री भए खै ? यो देशका युवा तन्नेरीहरु
यहाँ त महिला, बालवालिका अनि बुढाबुढीहरु देखिए
आविष्कार भएको छैन संसारमा सन्तुष्टि किन्ने धन
वर्षौदेखि आनन्दले सिस्नो र साग नपाएका भूँडीहरु देखिए
अभावै अभावले जोत्ने गर्छ, किसानहरुलाई यो देशमा
सुन जस्तै महंगो भाउमा बेचिएका गेडागुडीहरु देखिए
चिन्ता कसैलाई रत्तिभर छैन, जसले जे भने पनि
यहाँ त पद अनि पैसाको लागि लुछाचुँडीहरु देखिए
ईश्वर बलामी
२३।०९।२०१६
डाडाँमाथि घाम डुब्नै लागेको बेला थियो
बेसीँगाउँमा साहै रमाईलो मेला थियो
हराउनु थियो जसरी पनि यो मनलाई त्यहाँ
मोहनी लाउने उनको वैशालु रेला थियो
आइरह्यो उनकै मात्र रूप मेरो नजरमा
हुन त त्यहाँ हजारौं मान्छेहरूको भेला थियो
गुनासो न मलाई छ, न त मनलाई नै !
हारेर जानै पर्ने त्यो प्रेमको खेला थियो
नबोलेरै मसगँ छुट्टियौ त के भो र ?
भित्र माया बाहिर बाहिर हेला थियो
ईश्वर बलामी
2016/07/23
