गजल

कुनाकाप्चामा बच्चा बच्ची खेल्ने भाँडाकुँडीहरु देखिए
उप्कीएका भित्ताहरु, छेउैमा छरपस्ट मुडामुडीहरु देखिए

कहाँ बिक्री भए खै ? यो देशका युवा तन्नेरीहरु
यहाँ त महिला, बालवालिका अनि बुढाबुढीहरु देखिए

आविष्कार भएको छैन संसारमा सन्तुष्टि किन्ने धन
वर्षौदेखि आनन्दले सिस्नो र साग नपाएका भूँडीहरु देखिए

अभावै अभावले जोत्ने गर्छ, किसानहरुलाई यो देशमा
सुन जस्तै महंगो भाउमा बेचिएका गेडागुडीहरु देखिए

चिन्ता कसैलाई रत्तिभर छैन, जसले जे भने पनि
यहाँ त पद अनि पैसाको लागि लुछाचुँडीहरु देखिए

ईश्वर बलामी
२३।०९।२०१६